mauj-e-hawa ki zanjiren pahnenge dhum machaenge

mauj-e-havā kī zanjīreñ pahneñge dhuum machā.eñge

tanhā.ī ko giit meñ Dhāleñge gītoñ ko gā.eñge

kandhe TuuT rahe haiñ sahrā kī ye vus.at bhārī hai

ghar jaa.eñ to apnī nazar meñ aur subuk ho jā.eñge

parchhā.īñ ke is jañgal meñ kyā koī maujūd nahīñ

is dasht-e-tanhā.ī se kab log rihā.ī pā.eñge

zamzam aur gañgā-jal pī kar kaun bachā hai marne se

ham to aañsū kā ye amrit pī ke amar ho jā.eñge

jis bastī meñ sab vāqif hoñ vo bastī ik zindāñ hai

vahshat kī fasl aa.egī to ham kitnā ghabrā.eñge

aaj jo is bedardī se hañstā hai hamārī vahshat par

ik din ham us shahr ko 'rāhī' rah rah kar yaad ā.eñge

mauj-e-hawa ki zanjiren pahnenge dhum machaenge

tanhai ko git mein Dhaalenge giton ko gaenge

kandhe TuT rahe hain sahra ki ye wusat bhaari hai

ghar jaen to apni nazar mein aur subuk ho jaenge

parchhain ke is jangal mein kya koi maujud nahin

is dasht-e-tanhai se kab log rihai paenge

zamzam aur ganga-jal pi kar kaun bacha hai marne se

hum to aansu ka ye amrit pi ke amar ho jaenge

jis basti mein sab waqif hon wo basti ek zindan hai

wahshat ki fasl aaegi to hum kitna ghabraenge

aaj jo is bedardi se hansta hai hamari wahshat par

ek din hum us shahr ko 'rahi' rah rah kar yaad aaenge