maujon se Takrae hain hum tufanon se khele hain

maujoñ se Takrā.e haiñ ham tūfānoñ se khele haiñ

ik jiine kī ḳhātir ham ne kyā kyā sadme jhele haiñ

qalb-o-nazar ke afsāne ye raunaq-e-bazm-e-aish-o-tarab

jiite jī kī bāteñ haiñ sab jiite jī ke mele haiñ

un ke dam se raunaq-e-hastī un ke dam se ye duniyā

ḳhāk-basar haiñ zāhir meñ jo log baḌe albele haiñ

ye apnī himmat thī ham har mauj-e-balā se paar hue

khel bahut dil-doz the varna taqdīr ne khele haiñ

sochte haiñ ham tishna-laboñ ko kis ne aaj navāzā hai

kis ne apnī mast nazar se rangīñ jaam uñDele haiñ

un logoñ par kaash tarī kuchh chashm-e-ināyat ho jaatī

jin logoñ ne terī ḳhātir barsoñ sadme jhele haiñ

'āsī' ziist kī rāhoñ meñ mil jaa.e kisī kā saath magar

ye taqdīr kī bāteñ haiñ sab ye taqdīr ke mele haiñ

maujon se Takrae hain hum tufanon se khele hain

ek jine ki KHatir hum ne kya kya sadme jhele hain

qalb-o-nazar ke afsane ye raunaq-e-bazm-e-aish-o-tarab

jite ji ki baaten hain sab jite ji ke mele hain

un ke dam se raunaq-e-hasti un ke dam se ye duniya

KHak-basar hain zahir mein jo log baDe albele hain

ye apni himmat thi hum har mauj-e-bala se par hue

khel bahut dil-doz the warna taqdir ne khele hain

sochte hain hum tishna-labon ko kis ne aaj nawaza hai

kis ne apni mast nazar se rangin jam unDele hain

un logon par kash tari kuchh chashm-e-inayat ho jati

jin logon ne teri KHatir barson sadme jhele hain

'asi' zist ki rahon mein mil jae kisi ka sath magar

ye taqdir ki baaten hain sab ye taqdir ke mele hain