maujud jo saqi hai to phir kya nahin milta

maujūd jo saaqī hai to phir kyā nahīñ miltā

ham us ke haiñ kyā sāġhar-o-mīnā nahīñ miltā

ye ashk kā qatra hai mire dīda-e-tar kā

aisā to kabhī gauhar-e-yaktā nahīñ miltā

kyā ḳhaak nazar aa.e sar-e-tūr bhalā ab

is aañkh kā ab koī bhī muusā nahīñ miltā

kyoñ chhānte haiñ ḳhaak bayābān kī āshiq

majnūñ kī tarah nāqa-e-lailā nahīñ miltā

apne ko agar hai to ḳhudā par hai bharosa

duniyā meñ koī aur sahārā nahīñ miltā

muusā hī rahe haa.e na vo tuur hai baaqī

ai aañkh kahīñ ab vo tajallā nahīñ miltā

is ālam-e-takvīñ meñ ayaañ jalve haiñ lekin

ab koī inheñ dekhne vaalā nahīñ miltā

har zarre meñ hai nuur chamaktā huā us kā

lekin koī ab mahv-e-tamāshā nahīñ miltā

niyyat hai agar ḳhair to phir is ko kamī kyā

insān ko kyā rutba-e-ālī nahīñ miltā

māñge jo ba-iḳhlās koī apne ḳhudā se

kyā chiiz nahīñ detā vo kyā kyā nahīñ miltā

ai 'shād' agar dard-e-mohabbat nahīñ dil meñ

ye baat rahe yaad masīhā nahīñ miltā

maujud jo saqi hai to phir kya nahin milta

hum us ke hain kya saghar-o-mina nahin milta

ye ashk ka qatra hai mere dida-e-tar ka

aisa to kabhi gauhar-e-yakta nahin milta

kya KHak nazar aae sar-e-tur bhala ab

is aankh ka ab koi bhi musa nahin milta

kyon chhante hain KHak bayaban ki aashiq

majnun ki tarah naqa-e-laila nahin milta

apne ko agar hai to KHuda par hai bharosa

duniya mein koi aur sahaara nahin milta

musa hi rahe hae na wo tur hai baqi

ai aankh kahin ab wo tajalla nahin milta

is aalam-e-takwin mein ayan jalwe hain lekin

ab koi inhen dekhne wala nahin milta

har zarre mein hai nur chamakta hua us ka

lekin koi ab mahw-e-tamasha nahin milta

niyyat hai agar KHair to phir is ko kami kya

insan ko kya rutba-e-ali nahin milta

mange jo ba-iKHlas koi apne KHuda se

kya chiz nahin deta wo kya kya nahin milta

ai 'shad' agar dard-e-mohabbat nahin dil mein

ye baat rahe yaad masiha nahin milta