mausam-e-bahaar mein daraKHt pile paD gae

mausam-e-bahār meñ daraḳht piile paḌ ga.e

kisī ko chuum chuum ke gulāb niile paḌ ga.e

ye kyā huā ki ham se kuchh muzāhimat na ho sakī

hamāre hāth-pāoñ apne aap Dhīle paḌ ga.e

mizāj meñ bhī aag thī ajiib dauḌ-bhāg thī

tabhī to saare jism ke masām giile paḌ ga.e

masāfatoñ ke dam-qadam havā hamārī ham-qadam

zamīñ pe āsmān tak buland Tiile paḌ ga.e

hamāre iḳhtiyār meñ kahāñ thā ḳhud ko roknā

havā meñ aisā kaif thā shajar nashīle paḌ ga.e

vo ik surīlā shaḳhs jab nikal gayā thā shahr se

to be-suroñ ke naam bhī yahāñ surīle paḌ ga.e

tab us ne mere bāñkpan ko hausla nayā diyā

jab us ke pīchhe shahr ke ka.ī sajīle paḌ ga.e

musālahat kī koshisheñ adāvatoñ meñ Dhal ga.iiñ

hamāre us ke darmiyāñ ka.ī qabīle paḌ ga.e

mausam-e-bahaar mein daraKHt pile paD gae

kisi ko chum chum ke gulab nile paD gae

ye kya hua ki hum se kuchh muzahimat na ho saki

hamare hath-paon apne aap Dhile paD gae

mizaj mein bhi aag thi ajib dauD-bhag thi

tabhi to sare jism ke masam gile paD gae

masafaton ke dam-qadam hawa hamari ham-qadam

zamin pe aasman tak buland Tile paD gae

hamare iKHtiyar mein kahan tha KHud ko rokna

hawa mein aisa kaif tha shajar nashile paD gae

wo ek surila shaKHs jab nikal gaya tha shahr se

to be-suron ke nam bhi yahan surile paD gae

tab us ne mere bankpan ko hausla naya diya

jab us ke pichhe shahr ke kai sajile paD gae

musalahat ki koshishen adawaton mein Dhal gain

hamare us ke darmiyan kai qabile paD gae