mausam-e-gul ye teri zard sahafat kaisi

mausam-e-gul ye tirī zard sahāfat kaisī

phuul ma.asūm haiñ phūloñ se siyāsat kaisī

us ne daldal ke qarīñ chhoḌ dī uñglī merī

ḳhizr kahlātā hai kartā hai qayādat kaisī

jaise is baar havāoñ meñ lagī ho dīmak

ho rahī hai mirī sāñsoñ kī kifālat kaisī

maiñ jahāñ bhī rahūñ ye DhūñD nikālegī mujhe

jāntā huuñ ki hai miTTī kī basārat kaisī

chhin ga.ī mujh se har ik chiiz alif se yā tak

mere maazī ne ye likkhī thī vasiyyat kaisī

gar koī qatl nahīñ kartā hai andar se mujhe

phir mirī palkoñ pe ashkoñ kī ye mayyat kaisī

sañg hāthoñ meñ liye soch rahā huuñ 'ḳhurshīd'

aa.ine se ye nikal aa.ī raqābat kaisī

mausam-e-gul ye teri zard sahafat kaisi

phul masum hain phulon se siyasat kaisi

us ne daldal ke qarin chhoD di ungli meri

KHizr kahlata hai karta hai qayaadat kaisi

jaise is bar hawaon mein lagi ho dimak

ho rahi hai meri sanson ki kifalat kaisi

main jahan bhi rahun ye DhunD nikalegi mujhe

jaanta hun ki hai miTTi ki basarat kaisi

chhin gai mujh se har ek chiz alif se ya tak

mere mazi ne ye likkhi thi wasiyyat kaisi

gar koi qatl nahin karta hai andar se mujhe

phir meri palkon pe ashkon ki ye mayyat kaisi

sang hathon mein liye soch raha hun 'KHurshid'

aaine se ye nikal aai raqabat kaisi