mausam-e-hijr ki dil-soz nishani dega

mausam-e-hijr kī dil-soz nishānī degā

ishq kā dard hī unvān-e-kahānī degā

sang-e-be-māya hai shak aur yaqīñ hai gauhar

vaqt-e-taqrīr yahī shola-bayānī degā

khul na jaa.e kahīñ maktūb se rāz-e-pinhāñ

jab vo degā koī paiġhām zabānī degā

nafs-e-ammāra ko quvvat se kuchal de apnī

varna taklīf tujhe ahd-e-javānī degā

siikh le us ko baratne kā salīqa 'sāhil'

lafz be-jān sahī husn-e-ma.ānī degā

mausam-e-hijr ki dil-soz nishani dega

ishq ka dard hi unwan-e-kahani dega

sang-e-be-maya hai shak aur yaqin hai gauhar

waqt-e-taqrir yahi shola-bayani dega

khul na jae kahin maktub se raaz-e-pinhan

jab wo dega koi paigham zabani dega

nafs-e-ammara ko quwwat se kuchal de apni

warna taklif tujhe ahd-e-jawani dega

sikh le us ko baratne ka saliqa 'sahil'

lafz be-jaan sahi husn-e-maani dega