mausam ke mutabiq koi saman bhi nahin hai

mausam ke mutābiq koī sāmāñ bhī nahīñ hai

aur rut ke badal jaane kā imkāñ bhī nahīñ hai

DhūñDo to ḳhushī kā koī pal haath na aa.e

dekho to yahāñ koī pareshāñ bhī nahīñ hai

rishte meñ vo pahlī sī taḌap ab nahīñ miltī

haañ yuuñ to ba-zāhir vo gurezāñ bhī nahīñ hai

bas chhat ke shagāfoñ ko paḌe ghūrte rahiye

yaarā bhī nahīñ mahfil-e-yārāñ bhī nahīñ hai

phir kyuuñ na use hamdam o ham-zād banā leñ

jab yuuñ hai ki is dard kā darmāñ bhī nahīñ hai

vo vaqt bhī thā ham ko zamāne kī ḳhabar thī

ab yuuñ hai ki ehsās-e-rag-e-jāñ bhī nahīñ hai

ab qatl kī ḳhabroñ kā vo aalam hai ki 'arshad'

sun kar koī hairān o pareshāñ bhī nahīñ hai

mausam ke mutabiq koi saman bhi nahin hai

aur rut ke badal jaane ka imkan bhi nahin hai

DhunDo to KHushi ka koi pal hath na aae

dekho to yahan koi pareshan bhi nahin hai

rishte mein wo pahli si taDap ab nahin milti

han yun to ba-zahir wo gurezan bhi nahin hai

bas chhat ke shagafon ko paDe ghurte rahiye

yara bhi nahin mahfil-e-yaran bhi nahin hai

phir kyun na use hamdam o ham-zad bana len

jab yun hai ki is dard ka darman bhi nahin hai

wo waqt bhi tha hum ko zamane ki KHabar thi

ab yun hai ki ehsas-e-rag-e-jaan bhi nahin hai

ab qatl ki KHabron ka wo aalam hai ki 'arshad'

sun kar koi hairan o pareshan bhi nahin hai