mausam ke pas koi KHabar moatabar bhi ho

mausam ke paas koī ḳhabar mo'atabar bhī ho

mauj-e-havā ke saath tirā nāma-bar bhī ho

sun legā terī chaap to dhaḌkegā der tak

laakh apne gird-o-pesh se dil be-ḳhabar bhī ho

arzāñ se log bhāgte us ko to ġham nahīñ

lāzim nahīñ ki husn meñ husn-e-nazar bhī ho

barsoñ se jis makāñ meñ merī būd-o-bāsh hai

ab kyā ye lāzmī hai vahī merā ghar bhī ho

sustā.e jis ke saa.e meñ har aarzū mirī

is dil ke sahn meñ koī aisā shajar bhī ho

shah-rāh-e-raushnī pe chalā hai jo mere saath

tārīk rāstoñ meñ mirā ham-safar bhī ho

kitne hī phuul chehre dhuāñ ban ke rah ga.e

is sānehe se kaash koī bā-ḳhabar bhī ho

us ke liye to daav pe ḳhud ko lagā deñ ham

tadbīr vo batāo ki jo kārgar bhī ho

jaage hue guloñ hī se 'shabnam' ko pyaar hai

mumkin hai koī shai tire zer-e-asar bhī ho

mausam ke pas koi KHabar mo'atabar bhi ho

mauj-e-hawa ke sath tera nama-bar bhi ho

sun lega teri chap to dhaDkega der tak

lakh apne gird-o-pesh se dil be-KHabar bhi ho

arzan se log bhagte us ko to gham nahin

lazim nahin ki husn mein husn-e-nazar bhi ho

barson se jis makan mein meri bud-o-bash hai

ab kya ye lazmi hai wahi mera ghar bhi ho

sustae jis ke sae mein har aarzu meri

is dil ke sahn mein koi aisa shajar bhi ho

shah-rah-e-raushni pe chala hai jo mere sath

tarik raston mein mera ham-safar bhi ho

kitne hi phul chehre dhuan ban ke rah gae

is sanehe se kash koi ba-KHabar bhi ho

us ke liye to daw pe KHud ko laga den hum

tadbir wo batao ki jo kargar bhi ho

jage hue gulon hi se 'shabnam' ko pyar hai

mumkin hai koi shai tere zer-e-asar bhi ho