mausamon ke dukh ne dariya se rawani chhin li

mausamoñ ke dukh ne dariyā se ravānī chhīn lī

vaqt ke aaseb ne ham se javānī chhīn lī

ham to phir bhī be-hunar the hijratoñ ke ḳhauf ne

tā.eroñ se ḳhvāhish-e-naql-e-makānī chhīn lī

pahle mere gird us ne ḳhauf ke jaale bune

phir mire sar se ridā-e-āsmānī chhīn lī

aa.ine kā TuuT jaanā ik alāmat hai ki aaj

zindagī ne ham se apnī har nishānī chhīn lī

zehn ke saare darīchoñ ko muqaffal kar diyā

zabt ne mujh se mirī jādū-bayānī chhīn lī

mujh ko jin āñkhoñ ne jiine kā hunar baḳhshā 'nazīr'

aaj un āñkhoñ ne mujh se zindagānī chhīn lī

mausamon ke dukh ne dariya se rawani chhin li

waqt ke aaseb ne hum se jawani chhin li

hum to phir bhi be-hunar the hijraton ke KHauf ne

taeron se KHwahish-e-naql-e-makani chhin li

pahle mere gird us ne KHauf ke jale bune

phir mere sar se rida-e-asmani chhin li

aaine ka TuT jaana ek alamat hai ki aaj

zindagi ne hum se apni har nishani chhin li

zehn ke sare darichon ko muqaffal kar diya

zabt ne mujh se meri jadu-bayani chhin li

mujh ko jin aankhon ne jine ka hunar baKHsha 'nazir'

aaj un aankhon ne mujh se zindagani chhin li