mausamon wale nae dana o pani wale

mausamoñ vaale na.e daana o paanī vaale

ham vahī log vahī naql-e-makānī vaale

haañ bachā leñge yahī shahr ko jal jaane se

kuchh to baaqī haiñ abhī shahr meñ paanī vaale

rañg kyā ḳhuub jamegā jo kabhī mil baiTheñ

aur kuchh log tabī'at kī ravānī vaale

is liye aur bhulā detā huuñ vā'de aksar

mujh ko milte hī nahīñ yād-dahānī vaale

koī sāme.a jo mile mujh ko ḳhabar kar denā

haiñ mire shahr meñ sab log kahānī vaale

mausamon wale nae dana o pani wale

hum wahi log wahi naql-e-makani wale

han bacha lenge yahi shahr ko jal jaane se

kuchh to baqi hain abhi shahr mein pani wale

rang kya KHub jamega jo kabhi mil baiThen

aur kuchh log tabi'at ki rawani wale

is liye aur bhula deta hun wa'de aksar

mujh ko milte hi nahin yaad-dahani wale

koi samea jo mile mujh ko KHabar kar dena

hain mere shahr mein sab log kahani wale