maut bhi humse KHafa ho jaise

maut bhī ham se ḳhafā ho jaise

zindagī ek sazā ho jaise

dil ke vīrāne meñ vo yuuñ aa.e

phuul sahrā meñ khilā ho jaise

apnī barbādī pe sharminda huuñ

ye bhī merī hī ḳhatā ho jaise

ahmiyat ye hai tumhāre ḳhat kī

merī qismat kā likhā ho jaise

dil mirā yuuñ huā pāra-pāra

aa.ina TuuT gayā ho jaise

tum mujhe haath uThā kar koso

koī masrūf-e-duā ho jaise

un ke chehre pe vo ashkoñ kī namī

phuul shabnam se dhulā ho jaise

be-vajah mujh se bigaḌ baiThe haiñ

maiñ ne kuchh un ko kahā ho jaise

na tavajjoh na payām aur salām

mujh se vo ruuTh gayā ho jaise

mauj-e-bebāk kī mānind haiñ vo

koī tūfāñ meñ palā ho jaise

vo ḳhafā ho ke bahut sharmā.e

aa.ina dekh liyā ho jaise

aise anjān bane vo 'tal.at'

merā shikva na sunā ho jaise

maut bhi hum se KHafa ho jaise

zindagi ek saza ho jaise

dil ke virane mein wo yun aae

phul sahra mein khila ho jaise

apni barbaadi pe sharminda hun

ye bhi meri hi KHata ho jaise

ahmiyat ye hai tumhaare KHat ki

meri qismat ka likha ho jaise

dil mera yun hua para-para

aaina TuT gaya ho jaise

tum mujhe hath uTha kar koso

koi masruf-e-dua ho jaise

un ke chehre pe wo ashkon ki nami

phul shabnam se dhula ho jaise

be-wajah mujh se bigaD baiThe hain

main ne kuchh un ko kaha ho jaise

na tawajjoh na payam aur salam

mujh se wo ruTh gaya ho jaise

mauj-e-bebak ki manind hain wo

koi tufan mein pala ho jaise

wo KHafa ho ke bahut sharmae

aaina dekh liya ho jaise

aise anjaan bane wo 'talat'

mera shikwa na suna ho jaise