maut ko zist ki manzil ka pata kahte hain

maut ko ziist kī manzil kā patā kahte haiñ

rah-rav-e-ishq fanā ko bhī baqā kahte haiñ

ahl-e-vahshat kā na kuchh pochhiye kyā kahte haiñ

vo to apnā bhī kahā un kā kahā kahte haiñ

un ke kirdār kī azmat ko bhalā kyā kahiye

itne achchhe haiñ ki achchhoñ ko burā kahte haiñ

qaid-e-guftār bhī hai bandish-e-raftār bhī hai

aise māhaul ko zindān-e-balā kahte haiñ

be-sadā barbat-e-ḳhāmosh ko kahne vaalo

sunñe vaale to ḳhamoshī ko sadā kahte haiñ

jo ghaTā chhā ke na barse vo ghaTā kyā hai ghaTā

haañ agar TuuT ke barse to ghaTā kahte haiñ

ahl-e-haq dekh ke ā.īna-e-hastī 'kausar'

aks kā haal jo kahte haiñ bajā kahte haiñ

maut ko zist ki manzil ka pata kahte hain

rah-raw-e-ishq fana ko bhi baqa kahte hain

ahl-e-wahshat ka na kuchh pochhiye kya kahte hain

wo to apna bhi kaha un ka kaha kahte hain

un ke kirdar ki azmat ko bhala kya kahiye

itne achchhe hain ki achchhon ko bura kahte hain

qaid-e-guftar bhi hai bandish-e-raftar bhi hai

aise mahaul ko zindan-e-bala kahte hain

be-sada barbat-e-KHamosh ko kahne walo

sunne wale to KHamoshi ko sada kahte hain

jo ghaTa chha ke na barse wo ghaTa kya hai ghaTa

han agar TuT ke barse to ghaTa kahte hain

ahl-e-haq dekh ke aaina-e-hasti 'kausar'

aks ka haal jo kahte hain baja kahte hain