maut mera ek zara sa kaam kar

maut merā ik zarā sā kaam kar

zindagī kī dhuup meñ kuchh shaam kar

le ye chādar ḳhud-kushī kī ḳhud pe Daal

zindagī kuchh din zarā ārām kar

le ke aatā huuñ maiñ apnī vahy-e-jism

tū farāham ruuh kā ilhām kar

ruḳh taraqqī kā palaT de mere jism

varna mar jā.egā ḳhud ko ḳhaam kar

jism phir ḳhud hī qalandar ban gayā

ruuh ke dāman ko kuchh din thaam kar

dhajjiyāñ kar jā ke kā'be kā ġhilāf

dhajjiyoñ ko jāma-e-ehrām kar

'farhat-ehsās' apnī teġh-e-amn se

farhatullāhoñ kā qatl-e-'ām kar

maut mera ek zara sa kaam kar

zindagi ki dhup mein kuchh sham kar

le ye chadar KHud-kushi ki KHud pe Dal

zindagi kuchh din zara aaram kar

le ke aata hun main apni wahy-e-jism

tu faraham ruh ka ilham kar

ruKH taraqqi ka palaT de mere jism

warna mar jaega KHud ko KHam kar

jism phir KHud hi qalandar ban gaya

ruh ke daman ko kuchh din tham kar

dhajjiyan kar ja ke ka'be ka ghilaf

dhajjiyon ko jama-e-ehram kar

'farhat-ehsas' apni tegh-e-amn se

farhatullahon ka qatl-e-'am kar