maut se bad-tar hain jine ki kasak jati nahin

maut se bad-tar haiñ jiine kī kasak jaatī nahīñ

ḳhālī paimāne hue lekin khanak jaatī nahīñ

har nizām-e-tāza ke ḳhāliq ko laa.e daar tak

aaj tak duniyā ke logoñ kī sanak jaatī nahīñ

raqs kartī hai havā meñ ai mirī vahshat magar

ashk ban kar kyoñ in āñkhoñ se Tapak jaatī nahīñ

dostoñ kī chuTkiyāñ bhī qābil-e-tahsīn haiñ

zaḳhm bhar jaate haiñ tāsīr-e-namak jaatī nahīñ

ḳhāka-e-hastī huā be-rang imkāñ kho ga.e

phir bhī āñkhoñ se umīdoñ kī dhanak jaatī nahīñ

yūñhī bār-āvar nahīñ hotā tamanna kā shajar

aise hī chādar tire sar se Dhalak jaatī nahīñ

maut se bad-tar hain jine ki kasak jati nahin

KHali paimane hue lekin khanak jati nahin

har nizam-e-taza ke KHaliq ko lae dar tak

aaj tak duniya ke logon ki sanak jati nahin

raqs karti hai hawa mein ai meri wahshat magar

ashk ban kar kyon in aankhon se Tapak jati nahin

doston ki chuTkiyan bhi qabil-e-tahsin hain

zaKHm bhar jate hain tasir-e-namak jati nahin

KHaka-e-hasti hua be-rang imkan kho gae

phir bhi aankhon se umidon ki dhanak jati nahin

yunhi bar-awar nahin hota tamanna ka shajar

aise hi chadar tere sar se Dhalak jati nahin