mayassar KHwab hi mein aap ka didar ho jae

mayassar ḳhvāb hī meñ aap kā dīdār ho jaa.e

kisī sūrat to ye qismat mirī bedār ho jaa.e

karam-farmā ḳhizāñ pe gar nigāh-e-yār ho jaa.e

to jo hai ḳhaar gul ban kar gale kā haar ho jaa.e

dikhā de vo jamāl apnā kisī sūrat jo duniyā ko

to duniyā mahv ho kar mutlaqan bekār ho jaa.e

ye hastī merī un ke darmiyāñ ik hadd-e-fāsil hai

ye hastī merī miT jaa.e to vasl-e-yār ho jaa.e

jise sab sham.a kahte haiñ abhī ban jaa.e parvāna

mohabbat kā sar-e-mahfil agar iz.hār ho jaa.e

agar yūsuf hamārā misr meñ aa jaa.e be-parda

nayā ik aur qaa.em husn kā bāzār ho jaa.e

bahāreñ un kī āñkhoñ ke ishāroñ meñ gul-afshāñ haiñ

zarā vo dekh bhī leñ to ḳhizāñ gulzār ho jaa.e

ḳhatā kar kar ke halkā kar rahā huuñ daftar-e-qismat

ḳhatā gar ho na sarzad to ḳhatā kā baar ho jaa.e

shahādat kī talab meñ surḳh-rū ḳhud ko maiñ jab samjhūñ

lahū-ālūd ai qātil tirī talvār ho jaa.e

hai tūfān-e-nadāmat aur kashtī mere isyāñ kī

jo terā lutf ho jaa.e to beḌā paar ho jaa.e

'umar' jo kuchh vo deñ le lo ba-sad-shukr-o-niyāz un se

kahīñ aisā na ho iqrār se inkār ho jaa.e

mayassar KHwab hi mein aap ka didar ho jae

kisi surat to ye qismat meri bedar ho jae

karam-farma KHizan pe gar nigah-e-yar ho jae

to jo hai KHar gul ban kar gale ka haar ho jae

dikha de wo jamal apna kisi surat jo duniya ko

to duniya mahw ho kar mutlaqan bekar ho jae

ye hasti meri un ke darmiyan ek hadd-e-fasil hai

ye hasti meri miT jae to wasl-e-yar ho jae

jise sab shama kahte hain abhi ban jae parwana

mohabbat ka sar-e-mahfil agar izhaar ho jae

agar yusuf hamara misr mein aa jae be-parda

naya ek aur qaem husn ka bazar ho jae

bahaaren un ki aankhon ke ishaaron mein gul-afshan hain

zara wo dekh bhi len to KHizan gulzar ho jae

KHata kar kar ke halka kar raha hun daftar-e-qismat

KHata gar ho na sarzad to KHata ka bar ho jae

shahadat ki talab mein surKH-ru KHud ko main jab samjhun

lahu-alud ai qatil teri talwar ho jae

hai tufan-e-nadamat aur kashti mere isyan ki

jo tera lutf ho jae to beDa par ho jae

'umar' jo kuchh wo den le lo ba-sad-shukr-o-niyaz un se

kahin aisa na ho iqrar se inkar ho jae