maze kya kya hain gumrahi mein ye puchho mere dil se

maze kyā kyā haiñ gumrāhī meñ ye pūchho mire dil se

junūn-e-shauq meñ hai be-niyāzī mujh ko manzil se

na ghabrā ai musāfir jāda-e-tārīk-e-manzil se

milegī raushnī āḳhir charāġh-e-shauq-e-kāmil se

idhar dariyā-e-tufāñ-ḳhez meñ paiham huuñ maiñ ġhaltāñ

udhar baiThe tamāshā dekhte haiñ log sāhil se

nigāh-e-shauq itnā gudgudā de un ke jalve ko

ki vo ḳhud bā-ḳhabar ho jaa.eñ rāh-o-rasm-e-manzil se

shafaq ke surḳh pardoñ se hai māh-e-nau ziyā gustar

ki lailā jhāñktī hai parda-e-rangīn-e-mahmil se

agar un kī nazar rūThī manānā kab hai sahl us ko

girah paḌtī hai āsānī se par khultī hai mushkil se

ilāhī ḳhair kashtī kheltī hai merī tūfāñ meñ

kabhī maujoñ ke dāman se kabhī dāmān-e-sāhil se

talātum-ḳhez maujoñ ne ye kaisā kar diyā jaadū

safīna bhāgtā hai ḳhud mirā dāmān-e-sāhil se

mirī TuuTī huī kashtī kī barbādī muqaddar thī

bachī girdāb se Takrā ga.ī dāmān-e-sāhil se

abhī to aa ke baiThe ho zarā Thahro zarā bolo

nigāhoñ se nigāheñ mil chukīñ dil bhī mile dil se

'valī' bahr-e-ḳhudā zahmat na de ab mujh ko shirkat kī

ki dil hī sard hai sher-o-suḳhan kī sard mahfil se

maze kya kya hain gumrahi mein ye puchho mere dil se

junun-e-shauq mein hai be-niyazi mujh ko manzil se

na ghabra ai musafir jada-e-tarik-e-manzil se

milegi raushni aaKHir charagh-e-shauq-e-kaamil se

idhar dariya-e-tufan-KHez mein paiham hun main ghaltan

udhar baiThe tamasha dekhte hain log sahil se

nigah-e-shauq itna gudguda de un ke jalwe ko

ki wo KHud ba-KHabar ho jaen rah-o-rasm-e-manzil se

shafaq ke surKH pardon se hai mah-e-nau ziya gustar

ki laila jhankti hai parda-e-rangin-e-mahmil se

agar un ki nazar ruThi manana kab hai sahl us ko

girah paDti hai aasani se par khulti hai mushkil se

ilahi KHair kashti khelti hai meri tufan mein

kabhi maujon ke daman se kabhi daman-e-sahil se

talatum-KHez maujon ne ye kaisa kar diya jadu

safina bhagta hai KHud mera daman-e-sahil se

meri TuTi hui kashti ki barbaadi muqaddar thi

bachi girdab se Takra gai daman-e-sahil se

abhi to aa ke baiThe ho zara Thahro zara bolo

nigahon se nigahen mil chukin dil bhi mile dil se

'wali' bahr-e-KHuda zahmat na de ab mujh ko shirkat ki

ki dil hi sard hai sher-o-suKHan ki sard mahfil se