maze se dekh raha hai ye sab gagan wala

maze se dekh rahā hai ye sab gagan vaalā

pahāḌ Dhotā hai nāzuk sā ik badan vaalā

jahāñ bhī miltā hai phūloñ kā zikr kartā hai

lo aa rahā hai milo is se ik chaman vaalā

hue haiñ ham bhī ġhanī us kī is adā se aaj

luTā rahā hai tabassum vo ḳhush-dahan vaalā

baḳhīl hone ke charche the chaar sū us ke

magar vo shahr meñ thā is bahut hī dhan vaalā

use ye sun ke baḌā hī ajiib lagtā hai

mujhe milā hai jahāñ meñ shafīq man vaalā

nagar nagar se huā tang jab to āḳhir-kār

usī fazā meñ gayā lauT kar vo ban vaalā

hamārā ḳhuun bhī miltā hai us se chehra bhī

vo chāhe chiin kā ho yā vo ho yaman vaalā

ḳhushī se jhūmne lagtā thā dil 'nazar' merā

dayār-e-ġhair meñ jab bhī milā vatan vaalā

maze se dekh raha hai ye sab gagan wala

pahaD Dhota hai nazuk sa ek badan wala

jahan bhi milta hai phulon ka zikr karta hai

lo aa raha hai milo is se ek chaman wala

hue hain hum bhi ghani us ki is ada se aaj

luTa raha hai tabassum wo KHush-dahan wala

baKHil hone ke charche the chaar su us ke

magar wo shahr mein tha is bahut hi dhan wala

use ye sun ke baDa hi ajib lagta hai

mujhe mila hai jahan mein shafiq man wala

nagar nagar se hua tang jab to aaKHir-kar

usi faza mein gaya lauT kar wo ban wala

hamara KHun bhi milta hai us se chehra bhi

wo chahe chin ka ho ya wo ho yaman wala

KHushi se jhumne lagta tha dil 'nazar' mera

dayar-e-ghair mein jab bhi mila watan wala