mazhabi chingariyon se bastiyan jal jaengi

maz.habī chiñgāriyoñ se bastiyāñ jal jā.eñgī

in charāġhoñ se na uljho uñgliyāñ jal jā.eñgī

aag gulshan meñ lagā dī aur sochā bhī nahīñ

in guloñ ke saath kitnī titliyāñ jal jā.eñgī

nafratoñ kī āñdhiyāñ yuuñ hī agar chaltī rahī

raakh meñ pinhāñ haiñ jo chingāriyāñ jal jā.eñgī

āsmānoñ ko jalā kar ek din pachhtāoge

jal uThā sāvan to saarī badliyāñ jal jā.eñgī

koī shor-o-ġhul na sannāToñ kā phir hogā vajūd

saath hī āvāz ke ḳhāmoshiyāñ jal jā.eñgī

yuuñ hī gar tanhā.iyoñ ke dā.ere baḌhte ga.e

aadmī rah jā.egā parchhā.iyāñ jal jā.eñgī

phir mohabbat ke alāvoñ ko nafas raushan karo

dhīmī dhīmī aañch meñ sab talḳhiyāñ jal jā.eñgī

mazhabi chingariyon se bastiyan jal jaengi

in charaghon se na uljho ungliyan jal jaengi

aag gulshan mein laga di aur socha bhi nahin

in gulon ke sath kitni titliyan jal jaengi

nafraton ki aandhiyan yun hi agar chalti rahi

rakh mein pinhan hain jo chingariyan jal jaengi

aasmanon ko jala kar ek din pachhtaoge

jal uTha sawan to sari badliyan jal jaengi

koi shor-o-ghul na sannaTon ka phir hoga wajud

sath hi aawaz ke KHamoshiyan jal jaengi

yun hi gar tanhaiyon ke daere baDhte gae

aadmi rah jaega parchhaiyan jal jaengi

phir mohabbat ke alawon ko nafas raushan karo

dhimi dhimi aanch mein sab talKHiyan jal jaengi