mazmun achhuta bhi ho ashaar nae hon

mazmūn achhūtā bhī ho ash.ār na.e hoñ

ho baat ġhazal meñ na.ī afkār na.e hoñ

kaliyāñ bhī na.ī phuul na.e ḳhaar na.e hoñ

nazroñ kā taqāza hai ki gulzār na.e hoñ

phir aa ke zarā kījiye tajdīd-e-mohabbat

dil kī ye tamanna hai ki āzār na.e hoñ

is tarah se tartīb do ab sāz-e-mohabbat

kuchh taar purāne bhī hoñ kuchh taar na.e hoñ

mazmūn bahut hī hai purānā tirā shā.ir

aur vaqt ye kahtā hai ki afkār na.e hoñ

mai-ḳhāne kī har shai ko badal dījiye 'tishna'

saaqī bhī mai-o-jām bhī mai-ḳhvār na.e hoñ

mazmun achhuta bhi ho ashaar nae hon

ho baat ghazal mein nai afkar nae hon

kaliyan bhi nai phul nae KHar nae hon

nazron ka taqaza hai ki gulzar nae hon

phir aa ke zara kijiye tajdid-e-mohabbat

dil ki ye tamanna hai ki aazar nae hon

is tarah se tartib do ab saz-e-mohabbat

kuchh tar purane bhi hon kuchh tar nae hon

mazmun bahut hi hai purana tera shair

aur waqt ye kahta hai ki afkar nae hon

mai-KHane ki har shai ko badal dijiye 'tishna'

saqi bhi mai-o-jam bhi mai-KHwar nae hon