mazmun nahin hai saf nau-ahang-e-raaz hai

mazmūñ nahīñ hai saaf nau-āhang-e-rāz hai

har harf sher kā lab-e-ḳhāmosh saaz hai

maiñ aap kī lagā.e huuñ apne jigar meñ aag

siine meñ varna soz na dil meñ gudāz hai

ik be-ḳhudī ne Daalī haiñ lākhoñ hī gutthiyāñ

jo baat hai vo bhed hai jo shai hai raaz hai

vaañ husn se bane haiñ vo ik paikar-e-jamāl

yaañ ik muraqqā hasrat-e-nazzāra-bāz hai

vo haiñ ki baat hī nahīñ sunte ġharīb kī

maiñ huuñ ki daftar-e-gila-hā-e-darāz hai

pahle thā sar meñ hubb-e-vatan kā mire junūñ

ab ḳhabt-e-yāva-goī-e-dūr-o-darāz hai

achchhā hai vo shabāb ki kuchh sūjhtā na thā

ab har qadam pe ḳhauf-e-nasheb-o-farāz hai

ik silsila hai nā-mutanāhī ḳhayāl bhī

jitnā darāz kījiye is ko darāz hai

har vaqt kashmakash meñ haiñ ummīd-o-bīm ke

ahmaq haiñ jin ko ḳhvāhish-e-umr-e-darāz hai

ik aañkh ḳhauf-e-tīrgī-e-qabr meñ hai band

aur ek shauq arsa-e-mahshar meñ baaz hai

hai zarra zarra partav-e-mehr-e-jamāl-e-yār

duniyā nahīñ hai ḳhāna-e-ā.īna-sāz hai

kuchh āh-o-nāla kā nahīñ khultā asar magar

itnā ki is meñ soz hai aur us meñ saaz hai

'nādir' sunāo ik ġhazal-e-āshiqāna aur

aur ik gilās abhī to dar-e-tauba baaz hai

mazmun nahin hai saf nau-ahang-e-raaz hai

har harf sher ka lab-e-KHamosh saz hai

main aap ki lagae hun apne jigar mein aag

sine mein warna soz na dil mein gudaz hai

ek be-KHudi ne Dali hain lakhon hi gutthiyan

jo baat hai wo bhed hai jo shai hai raaz hai

wan husn se bane hain wo ek paikar-e-jamal

yan ek muraqqa hasrat-e-nazzara-baz hai

wo hain ki baat hi nahin sunte gharib ki

main hun ki daftar-e-gila-ha-e-daraaz hai

pahle tha sar mein hubb-e-watan ka mere junun

ab KHabt-e-yawa-goi-e-dur-o-daraaz hai

achchha hai wo shabab ki kuchh sujhta na tha

ab har qadam pe KHauf-e-nasheb-o-faraaz hai

ek silsila hai na-mutanahi KHayal bhi

jitna daraaz kijiye is ko daraaz hai

har waqt kashmakash mein hain ummid-o-bim ke

ahmaq hain jin ko KHwahish-e-umr-e-daraaz hai

ek aankh KHauf-e-tirgi-e-qabr mein hai band

aur ek shauq arsa-e-mahshar mein baz hai

hai zarra zarra partaw-e-mehr-e-jamal-e-yar

duniya nahin hai KHana-e-aina-saz hai

kuchh aah-o-nala ka nahin khulta asar magar

itna ki is mein soz hai aur us mein saz hai

'nadir' sunao ek ghazal-e-ashiqana aur

aur ek gilas abhi to dar-e-tauba baz hai