mehman koi ban ke jo aae kabhi kabhaar

mehmān koī ban ke jo aa.e kabhī kabhār

bas jaa.e dil kī ujḌī sarā.e kabhī kabhār

insān haiñ hameñ bhī zarūrat hai pyaar kī

koī gale hameñ bhī lagā.e kabhī kabhār

bādal ko apne saare farā.ez agar haiñ yaad

sahrā kī pyaas bhī vo bujhā.e kabhī kabhār

ab raushnī meñ aa.eñ to aa.eñ bhī kaise ham

qad nāpte haiñ apne hī saa.e kabhī kabhār

dil mānñe pe laakh na tayyār ho kabhī

ahbāb phir bhī dete haiñ raa.e kabhī kabhār

marham nasīb hī na huā jin ko aaj tak

ham ne kuchh aise zaḳhm bhī khaa.e kabhī kabhār

'shāhid' ne jis ke naam kabhī kī thī zindagī

'shāhid' kā vo bhī saath nibhā.e kabhī kabhār

mehman koi ban ke jo aae kabhi kabhaar

bas jae dil ki ujDi sarae kabhi kabhaar

insan hain hamein bhi zarurat hai pyar ki

koi gale hamein bhi lagae kabhi kabhaar

baadal ko apne sare faraez agar hain yaad

sahra ki pyas bhi wo bujhae kabhi kabhaar

ab raushni mein aaen to aaen bhi kaise hum

qad napte hain apne hi sae kabhi kabhaar

dil manne pe lakh na tayyar ho kabhi

ahbab phir bhi dete hain rae kabhi kabhaar

marham nasib hi na hua jin ko aaj tak

hum ne kuchh aise zaKHm bhi khae kabhi kabhaar

'shahid' ne jis ke nam kabhi ki thi zindagi

'shahid' ka wo bhi sath nibhae kabhi kabhaar