mehrban koi nazar aae to samjhun tu hai

mehrbāñ koī nazar aa.e to samjhūñ tū hai

phuul mahkeñ to ye jānoñ ki tirī ḳhushbū hai

aql taslīm nahīñ kartī pe dil māntā hai

vo koī mo.ajaza hai vahm hai yā jaadū hai

ab tirā zikr kareñge na tujhe yaad kabhī

haañ magar dil ke dhaḌakne pe kise qaabū hai

kuchh mizāj apnā hī begāna huā jaatā hai

varna us shaḳhs kī to narm-ravī kī ḳhū hai

ġham rag-o-pai meñ utartā hai lahū kī sūrat

dard palkoñ pe laraztā huā ik aañsū hai

aaj kuchh rañg digar hai mire ghar kā 'ḳhālid'

sochtā huuñ ye tirī yaad hai yā ḳhud tū hai

mehrban koi nazar aae to samjhun tu hai

phul mahken to ye jaanon ki teri KHushbu hai

aql taslim nahin karti pe dil manta hai

wo koi moajaza hai wahm hai ya jadu hai

ab tera zikr karenge na tujhe yaad kabhi

han magar dil ke dhaDakne pe kise qabu hai

kuchh mizaj apna hi begana hua jata hai

warna us shaKHs ki to narm-rawi ki KHu hai

gham rag-o-pai mein utarta hai lahu ki surat

dard palkon pe larazta hua ek aansu hai

aaj kuchh rang digar hai mere ghar ka 'KHalid'

sochta hun ye teri yaad hai ya KHud tu hai