mehrbanon ki mehrbani se

mehrbānoñ kī mehrbānī se

log milte haiñ ḳhush-bayānī se

jab se Duubī hai sohnī dariyā meñ

mujh ko lagtī hai aag paanī se

zalzaloñ se makān girte haiñ

ghar ujaḌte haiñ bad-gumānī se

koī samjhā.e jaane vaale ko

dil bahaltā nahīñ nishānī se

aap nāzāñ haiñ jis javānī par

ham bhī guzre haiñ us javānī se

qissa-go se yahī guzārish hai

duur raajā kare na raanī se

zindagānī se ek shikva hai

ek shikva hai zindagānī se

kyoñ na hogā shigāf patthar meñ

ashk bahtā rahā ravānī se

'faiz' duniyā sañbhāl ab apnī

mujh ko be-daḳhl kar kahānī se

mehrbanon ki mehrbani se

log milte hain KHush-bayani se

jab se Dubi hai sohni dariya mein

mujh ko lagti hai aag pani se

zalzalon se makan girte hain

ghar ujaDte hain bad-gumani se

koi samjhae jaane wale ko

dil bahalta nahin nishani se

aap nazan hain jis jawani par

hum bhi guzre hain us jawani se

qissa-go se yahi guzarish hai

dur raja kare na rani se

zindagani se ek shikwa hai

ek shikwa hai zindagani se

kyon na hoga shigaf patthar mein

ashk bahta raha rawani se

'faiz' duniya sanbhaal ab apni

mujh ko be-daKHl kar kahani se