mein aisa zauq-e-zebaish ba-ru-e-kar le aaya

meñ aisā zauq-e-zebā.ish ba-rū-e-kār le aayā

ki ḳhud-ārā.ī kī ḳhātir libās-e-dār le aayā

zamīñ kī mehvarī gardish se umreñ ghaTtī baḌhtī haiñ

guzartā vaqt saa.e ko pas-e-dīvār le aayā

magar mujh ko ye ehsās-e-nadāmt maar Dālegā

parā.e peḌ se phal toḌ kar do chaar le aayā

ye saare log us ke haq meñ raa.e dene vaale haiñ

vo apnī saarī tasvīreñ sar-e-bāzār le aayā

jahāñ se vāpsī kā rāsta qismat se miltā hai

vahāñ tak qāfile ko qāfila-sālār le aayā

virāsat meñ 'nasīm' is se baḌī jāgīr kyā hogī

maiñ dil kī dhaḌkanoñ meñ apnī maañ kā pyaar le aayā

mein aisa zauq-e-zebaish ba-ru-e-kar le aaya

ki KHud-arai ki KHatir libas-e-dar le aaya

zamin ki mehwari gardish se umren ghaTti baDhti hain

guzarta waqt sae ko pas-e-diwar le aaya

magar mujh ko ye ehsas-e-nadamt mar Dalega

parae peD se phal toD kar do chaar le aaya

ye sare log us ke haq mein rae dene wale hain

wo apni sari taswiren sar-e-bazar le aaya

jahan se wapsi ka rasta qismat se milta hai

wahan tak qafile ko qafila-salar le aaya

wirasat mein 'nasim' is se baDi jagir kya hogi

main dil ki dhaDkanon mein apni man ka pyar le aaya