mein aksar ehtimam-e-KHatir-e-sayyaad karta hun

meñ aksar ehtimām-e-ḳhātir-e-sayyād kartā huuñ

gañvā kar apne bāl-o-par qafas ābād kartā huuñ

muhandis huuñ maiñ harf-o-saut ke taaza jahānoñ kā

so apne sher meñ lahje na.e ījād kartā huuñ

to kyā fatvā koī darkār hai mere junūñ ko bhī

ki jā kar maiñ faqīh-e-shahr se fariyād kartā huuñ

sajātā huuñ kisī kī yaad se maiñ ġham-kada apnā

isī sūrat dil-e-nāshād ko maiñ shaad kartā huuñ

taqāzā hai ḳhirad kā maiñ bhulā duuñ ab use lekin

na jaane kyoñ maiñ rah rah kar usī ko yaad kartā huuñ

na.e raste banāne ke na.e ādāb haiñ phir bhī

maiñ apne daur meñ rah kar ġham-e-farhād kartā huuñ

mirī jānib jo pheñke haiñ mire ahbāb ne patthar

maiñ un ko kāmyābī kī qavī buniyād kartā huuñ

samajh meñ kuchh nahīñ aatā ye kaisā adl hai 'ādil'

ki ḳhud par zulm kartā aur ḳhud fariyād kartā huuñ

mein aksar ehtimam-e-KHatir-e-sayyaad karta hun

ganwa kar apne baal-o-par qafas aabaad karta hun

muhandis hun main harf-o-saut ke taza jahanon ka

so apne sher mein lahje nae ijad karta hun

to kya fatwa koi darkar hai mere junun ko bhi

ki ja kar main faqih-e-shahr se fariyaad karta hun

sajata hun kisi ki yaad se main gham-kada apna

isi surat dil-e-nashad ko main shad karta hun

taqaza hai KHirad ka main bhula dun ab use lekin

na jaane kyon main rah rah kar usi ko yaad karta hun

nae raste banane ke nae aadab hain phir bhi

main apne daur mein rah kar gham-e-farhad karta hun

meri jaanib jo phenke hain mere ahbab ne patthar

main un ko kaamyabi ki qawi buniyaad karta hun

samajh mein kuchh nahin aata ye kaisa adl hai 'adil'

ki KHud par zulm karta aur KHud fariyaad karta hun