mera dil saf hai har shaKHs se darpan ki tarah

merā dil saaf hai har shaḳhs se darpan kī tarah

maiñ to dushman se bhī miltā nahīñ dushman kī tarah

be-tahāshā jo tirī yaad kabhī aa.ī hai

ashk āñkhoñ se barasne lage sāvan kī tarah

mere hoñToñ ke tabassum pe na jaao yaaro

zindagī hai mirī jalte hue īñdhan kī tarah

barq rah rah ke chamaktī hai chamakne diije

ham banā.eñge nasheman ko nasheman kī tarah

nang-e-kirdār meñ bazm-e-bashariyyat ke liye

haath phailā.eñ jo phaile hue dāman kī tarah

maslahat kā ye taqāzā hai ki bach kar rahiye

aaj kā daur hai biphrī huī nāgan kī tarah

roz khilte haiñ na.e phuul mire dāman meñ

duur gulshan se mahakte hue gulshan kī tarah

vaqt kī baat hai ham taḳht-nashīnān-e-jahāñ

dar-ba-dar phirte haiñ muhtāj-e-nasheman kī tarah

shukr sad-shukr zamāne kī nigāhoñ meñ 'kamāl'

merā dāman nahīñ maske hue dāman kī tarah

mera dil saf hai har shaKHs se darpan ki tarah

main to dushman se bhi milta nahin dushman ki tarah

be-tahasha jo teri yaad kabhi aai hai

ashk aankhon se barasne lage sawan ki tarah

mere honTon ke tabassum pe na jao yaro

zindagi hai meri jalte hue indhan ki tarah

barq rah rah ke chamakti hai chamakne dije

hum banaenge nasheman ko nasheman ki tarah

nang-e-kirdar mein bazm-e-bashariyyat ke liye

hath phailaen jo phaile hue daman ki tarah

maslahat ka ye taqaza hai ki bach kar rahiye

aaj ka daur hai biphri hui nagan ki tarah

roz khilte hain nae phul mere daman mein

dur gulshan se mahakte hue gulshan ki tarah

waqt ki baat hai hum taKHt-nashinan-e-jahan

dar-ba-dar phirte hain muhtaj-e-nasheman ki tarah

shukr sad-shukr zamane ki nigahon mein 'kamal'

mera daman nahin maske hue daman ki tarah