mera ek ik harf paimana meri iza ka hai

merā ik ik harf paimāna mirī iizā kā hai

tishnagī kī vus.ateñ haiñ ye karam dariyā kā hai

ban ga.e sahrā meñ ghar lekin gharoñ meñ aaj tak

rau vahī vahshat kī hai mausam vahī sahrā kā hai

chāhe bik jā.ūñ chukā.ūñgā magar sab kā hisāb

mujh pe qarz imroz kā hai mujh pe haq fardā kā hai

gard-o-bād-e-dasht kā ehsāñ ki hai tū saath saath

is safar meñ kaun mujh āvāra o tanhā kā hai

jaa.e bhī koī nayā rah-rav to ab jaa.e kidhar

be-karāñ ik sail har jānib nuqūsh-e-pā kā hai

kam na thī kal bhī ufuq-tābī magar vo kal kī thī

aaj ubharne vaalā sūraj aaj kī duniyā kā hai

mera ek ek harf paimana meri iza ka hai

tishnagi ki wusaten hain ye karam dariya ka hai

ban gae sahra mein ghar lekin gharon mein aaj tak

rau wahi wahshat ki hai mausam wahi sahra ka hai

chahe bik jaun chukaunga magar sab ka hisab

mujh pe qarz imroz ka hai mujh pe haq farda ka hai

gard-o-baad-e-dasht ka ehsan ki hai tu sath sath

is safar mein kaun mujh aawara o tanha ka hai

jae bhi koi naya rah-raw to ab jae kidhar

be-karan ek sail har jaanib nuqush-e-pa ka hai

kam na thi kal bhi ufuq-tabi magar wo kal ki thi

aaj ubharne wala suraj aaj ki duniya ka hai