mera paikar muKHtalif samton mein baT kar rah gaya

merā paikar muḳhtalif samtoñ meñ baT kar rah gayā

gard kī sūrat havāoñ se lipaT kar rah gayā

maiñ chalā thā justujū-e-ġhuncha-o-gul meñ magar

ek kāñTā mere dāman se lipaT kar rah gayā

jab nazar aaya ki rahzan hai ba-shakl-e-rahnumā

qāfile vāloñ se maiñ dānista kaT kar rah gayā

zindagī jo ik haqīqat thī kahānī ban ga.ī

vāqi'a thā maiñ jo afsānoñ meñ baT kar rah gayā

hādisa dar hādisa dar hādisa dar hādisa

saarā maazī ek aañsū meñ simaT kar rah gayā

TukḌe TukḌe kar diyā kis ne vafā kā aa.ina

merā chehra anginat chehroñ meñ baT kar rah gayā

chhīn liiñ 'razmī' taraqqī ne hamārī 'azmateñ

jitnā qad ūñchā huā insān ghaT kar rah gayā

mera paikar muKHtalif samton mein baT kar rah gaya

gard ki surat hawaon se lipaT kar rah gaya

main chala tha justuju-e-ghuncha-o-gul mein magar

ek kanTa mere daman se lipaT kar rah gaya

jab nazar aaya ki rahzan hai ba-shakl-e-rahnuma

qafile walon se main danista kaT kar rah gaya

zindagi jo ek haqiqat thi kahani ban gai

waqi'a tha main jo afsanon mein baT kar rah gaya

hadisa dar hadisa dar hadisa dar hadisa

sara mazi ek aansu mein simaT kar rah gaya

TukDe TukDe kar diya kis ne wafa ka aaina

mera chehra anginat chehron mein baT kar rah gaya

chhin lin 'razmi' taraqqi ne hamari 'azmaten

jitna qad uncha hua insan ghaT kar rah gaya