mere aaine mein tum surat-e-zeba dekho

mere ā.īne meñ tum sūrat-e-zebā dekho

tum ne ab tak jo na dekhā ho vo jalvā dekho

ik jahāñ da.avat-e-nazzāra hai kyā kyā dekho

husn-e-dīdār-talab kā bhī tamāshā dekho

jāgtī āñkhoñ ke ḳhvāboñ kī bhī ta.abīreñ hoñ

ḳhvāb kal raat jo dekhā thā adhūrā dekho

hai vahī maulā vahī apnā vakīl aur nasīr

tum yahūd aur nasārā kā sahārā dekho

kurra-e-arz bhī mehvar se haTā jaatā hai

be-jahat husn kā ik ye bhī tamāshā dekho

surma-e-shams-o-qamar rāhat-e-chashm-e-nargis

dil-e-bīnā se hī kaifiyyat-e-fardā dekho

kahkashāñ luuT dī hai haath baḌhā kar ham ne

ab ḳhalā se bhī pare jā ke ujālā dekho

ham ḳhalāoñ se bhī añgāre lapak lete haiñ

kis jagah girtā hai TuuTā huā taarā dekho

na.ī duniyā meñ na.e chāñd sitāre laao

'qādrī' ne bhī lagāyā hai ye shosha dekho

mere aaine mein tum surat-e-zeba dekho

tum ne ab tak jo na dekha ho wo jalwa dekho

ek jahan dawat-e-nazzara hai kya kya dekho

husn-e-didar-talab ka bhi tamasha dekho

jagti aankhon ke KHwabon ki bhi tabiren hon

KHwab kal raat jo dekha tha adhura dekho

hai wahi maula wahi apna wakil aur nasir

tum yahud aur nasara ka sahaara dekho

kurra-e-arz bhi mehwar se haTa jata hai

be-jahat husn ka ek ye bhi tamasha dekho

surma-e-shams-o-qamar rahat-e-chashm-e-nargis

dil-e-bina se hi kaifiyyat-e-farda dekho

kahkashan luT di hai hath baDha kar hum ne

ab KHala se bhi pare ja ke ujala dekho

hum KHalaon se bhi angare lapak lete hain

kis jagah girta hai TuTa hua tara dekho

nai duniya mein nae chand sitare lao

'qadri' ne bhi lagaya hai ye shosha dekho