mere badan ki aag hi jhulsa gai mujhe

mere badan kī aag hī jhulsā ga.ī mujhe

dekhā jo aa.ina to hañsī aa ga.ī mujhe

merī numūd kyā hai bas ik tūda-e-siyāh

kaundī kabhī jo barq to chamkā ga.ī mujhe

jaise maiñ ik sabaq thā kabhī kā paḌhā huā

uTThī jo vo nigāh to dohrā ga.ī mujhe

har sub.h maiñ ne ḳhud ko ba-mushkil baham kiyā

aa.ī jo ġham kī raat to bikhrā ga.ī mujhe

maiñ dasht-e-ārzū pe ghaTā ban ke chhā gayā

garmī tire vajūd kī barsā ga.ī mujhe

ye fart-e-intizār hai yā shiddat-e-hirās

ḳhāmoshiyoñ kī chaap bhī chauñkā ga.ī mujhe

terī nazar bhī de na sakī zindagī kā fan

marne kā khel sahl thā sikhlā ga.ī mujhe

mere badan ki aag hi jhulsa gai mujhe

dekha jo aaina to hansi aa gai mujhe

meri numud kya hai bas ek tuda-e-siyah

kaundi kabhi jo barq to chamka gai mujhe

jaise main ek sabaq tha kabhi ka paDha hua

uTThi jo wo nigah to dohra gai mujhe

har subh main ne KHud ko ba-mushkil baham kiya

aai jo gham ki raat to bikhra gai mujhe

main dasht-e-arzu pe ghaTa ban ke chha gaya

garmi tere wajud ki barsa gai mujhe

ye fart-e-intizar hai ya shiddat-e-hiras

KHamoshiyon ki chap bhi chaunka gai mujhe

teri nazar bhi de na saki zindagi ka fan

marne ka khel sahl tha sikhla gai mujhe