mere gham ki manzil mein jaise wo bhi Thahre hain

mere ġham kī manzil meñ jaise vo bhī Thahre haiñ

ḳhvāb jo nahīñ dekhe kis qadar sunahre haiñ

muddateñ huiiñ un ko ek baar dekhā thā

aaj tak nigāhoñ par āñsuoñ ke pahre haiñ

kab kisī kī sunte haiñ un ko dekhne vaale

jin kī aañkh raushan hai un ke kaan bahre haiñ

kam nahīñ taġhāful se iltifāt bhī un kā

daaġh vo bhī taaza haiñ zaḳhm ye bhī gahre haiñ

kyā ḳhabar zamāne ko ham se kitne dīvāne

zindagī ke dāman par ashk ban ke Thahre haiñ

dil meñ kyā hai bātoñ se kuchh pata nahīñ chaltā

āj-kal zamāne meñ dost kitne gahre haiñ

yādgār-e-māzī haiñ 'badr' apne dāġh-e-dil

qāfile bahāroñ ke is jagah bhī Thahre haiñ

mere gham ki manzil mein jaise wo bhi Thahre hain

KHwab jo nahin dekhe kis qadar sunahre hain

muddaten huin un ko ek bar dekha tha

aaj tak nigahon par aansuon ke pahre hain

kab kisi ki sunte hain un ko dekhne wale

jin ki aankh raushan hai un ke kan bahre hain

kam nahin taghaful se iltifat bhi un ka

dagh wo bhi taza hain zaKHm ye bhi gahre hain

kya KHabar zamane ko hum se kitne diwane

zindagi ke daman par ashk ban ke Thahre hain

dil mein kya hai baaton se kuchh pata nahin chalta

aaj-kal zamane mein dost kitne gahre hain

yaadgar-e-mazi hain 'badr' apne dagh-e-dil

qafile bahaaron ke is jagah bhi Thahre hain