mere ghar hon ki kahin dur darichon mein charagh

mere ghar hoñ ki kahīñ duur darīchoñ meñ charāġh

shab-e-hijrāñ kā hai dastūr darīchoñ meñ charāġh

muntazir aañkh to thak-hār ke so jaatī hai

jāgte rahte haiñ majbūr darīchoñ meñ charāġh

ab to aatā hī nahīñ merī galī meñ koī

kis kī ḳhidmat pe haiñ māmūr darīchoñ meñ charāġh

maiñ huuñ āvāra-e-shab aur ye zād-e-shab haiñ

dīda-e-tar dil-e-ranjūr darīchoñ meñ charāġh

merā aur us kā ta'alluq hai faqat itnā sā

jaise rakkhe hoñ kahīñ duur darīchoñ meñ charāġh

us ke lauT aane se bīnā.ī bhī lauT aa.ī hai

jagmagā uTThe haiñ be-nūr darīchoñ meñ charāġh

ab to āzād huuñ dīvār-o-dar-o-bām se maiñ

ab havā ko nahīñ manzūr darīchoñ meñ charāġh

shab-e-ummīd bhī Dhalne ko hai aa jā 'sāgar'

bujhne vaale haiñ ye mahjūr darīchoñ meñ charāġh

mere ghar hon ki kahin dur darichon mein charagh

shab-e-hijran ka hai dastur darichon mein charagh

muntazir aankh to thak-haar ke so jati hai

jagte rahte hain majbur darichon mein charagh

ab to aata hi nahin meri gali mein koi

kis ki KHidmat pe hain mamur darichon mein charagh

main hun aawara-e-shab aur ye zad-e-shab hain

dida-e-tar dil-e-ranjur darichon mein charagh

mera aur us ka ta'alluq hai faqat itna sa

jaise rakkhe hon kahin dur darichon mein charagh

us ke lauT aane se binai bhi lauT aai hai

jagmaga uTThe hain be-nur darichon mein charagh

ab to aazad hun diwar-o-dar-o-baam se main

ab hawa ko nahin manzur darichon mein charagh

shab-e-ummid bhi Dhalne ko hai aa ja 'sagar'

bujhne wale hain ye mahjur darichon mein charagh