mere gul-gasht ko sajata hua

mere gul-gasht ko sajātā huā

kaun hai mujh meñ gul khilātā huā

ek jhoñkā hai vo ḳhayāloñ kā

tez ḳhushbū se jhilmilātā huā

ik musavvir milā thā raste meñ

rang se zindagī banātā huā

chup kī galiyoñ se vo guzartā hai

apnī ḳhāmoshiyoñ ko gaatā huā

phir koī she'r mujh pe utrā hai

saut meñ chāshnī milātā huā

lams bebāk hai bahut us kā

ang se rang ko churātā huā

us kī āñkhoñ kā rang gahrā hai

raat se tīrgī churātā huā

mujh se kahtā hai Dar nahīñ jaanā

mere ḳhadshāt ko baḌhātā huā

niiñd bār-e-digar nahīñ aatī

rukne lagtā hai ḳhvāb aatā huā

vo ḳhudā kuchh to sochtā hogā

is tarah bebasī banātā huā

'nāziya' sab ko to nahīñ dikhtā

ashk āñkhoñ meñ jhilmilātā huā

mere gul-gasht ko sajata hua

kaun hai mujh mein gul khilata hua

ek jhonka hai wo KHayalon ka

tez KHushbu se jhilmilata hua

ek musawwir mila tha raste mein

rang se zindagi banata hua

chup ki galiyon se wo guzarta hai

apni KHamoshiyon ko gata hua

phir koi she'r mujh pe utra hai

saut mein chashni milata hua

lams bebak hai bahut us ka

ang se rang ko churaata hua

us ki aankhon ka rang gahra hai

raat se tirgi churaata hua

mujh se kahta hai Dar nahin jaana

mere KHadshat ko baDhata hua

nind bar-e-digar nahin aati

rukne lagta hai KHwab aata hua

wo KHuda kuchh to sochta hoga

is tarah bebasi banata hua

'naziya' sab ko to nahin dikhta

ashk aankhon mein jhilmilata hua