mere ham-sae ko mujhse ji churana aa gaya

mere ham-sā.e ko mujh se jī churānā aa gayā

jab maiñ us ke sāmne jaisā thā vaisā aa gayā

mutma.in thā puure ghar meñ raushnī bhar dūñgā aaj

pahlā dīpak hī jalā aur ḳhud kā saayā aa gayā

phir batā.ūñgā sabhī ko sar jhukāne kā hunar

pahle ḳhud hairān ho luuñ ye mujhe kyā aa gayā

chhūne kī zid meñ use mahsūs kar paayā nahīñ

pyaas hī le kar gayā thā aur pyāsā aa gayā

kyā añdherā miT gayā sab ne faqat pūchhā yahī

kab kisī ko thī tasallī diip zinda aa gayā

mere ham-sae ko mujh se ji churana aa gaya

jab main us ke samne jaisa tha waisa aa gaya

mutmain tha pure ghar mein raushni bhar dunga aaj

pahla dipak hi jala aur KHud ka saya aa gaya

phir bataunga sabhi ko sar jhukane ka hunar

pahle KHud hairan ho lun ye mujhe kya aa gaya

chhune ki zid mein use mahsus kar paya nahin

pyas hi le kar gaya tha aur pyasa aa gaya

kya andhera miT gaya sab ne faqat puchha yahi

kab kisi ko thi tasalli dip zinda aa gaya