mere hi aansuon ke shikasta bahaw par

mere hī āñsuoñ ke shikasta bahāv par

mujh ko biThā gayā koī kāġhaz kī naav par

mere paroñ ko kaaT ke vo saath le gayā

ab to maiñ uḌ rahā huuñ havā ke dabāv par

bigḌī huī hai chaal kuchh aisī tire baġhair

jaise maiñ chal rahā huuñ sulagte alaav par

kitnā hasīn ḳhvāb dikhā.ī diyā mujhe

marham lagā rahā thā koī mere ghaav par

manzil talak pahuñchne kā kahtā rahā magar

mujh se nazar churā gayā pahle paḌāv par

us se kaho 'umair' vo lauT aa.e ek baar

aa.ī huī hai zindagī ab chal-chalāv par

mere hi aansuon ke shikasta bahaw par

mujh ko biTha gaya koi kaghaz ki naw par

mere paron ko kaT ke wo sath le gaya

ab to main uD raha hun hawa ke dabaw par

bigDi hui hai chaal kuchh aisi tere baghair

jaise main chal raha hun sulagte alaw par

kitna hasin KHwab dikhai diya mujhe

marham laga raha tha koi mere ghaw par

manzil talak pahunchne ka kahta raha magar

mujh se nazar chura gaya pahle paDaw par

us se kaho 'umair' wo lauT aae ek bar

aai hui hai zindagi ab chal-chalaw par