mere honTon pe meri aah-o-fughan hai jaanan

mere hoñToñ pe mirī āh-o-fuġhāñ hai jānāñ

log kahte haiñ baḌī talḳh zabāñ hai jānāñ

jānte haiñ ki mohabbat kā maraz hai mujh ko

pūchh lete haiñ magar dard kahāñ hai jānāñ

daas lagte haiñ ye duniyā ke suḳhanvar tere

terī bātoñ kā vo andāz-e-bayāñ hai jānāñ

kah ke patthar jise duniyā ne lagā dī Thokar

vo mirā dil hai mohabbat kā makāñ hai jānāñ

dard dīvār pe mandir kī likhī chaupā.ī

aah merī kisī masjid kī azaañ hai jānāñ

kar ke ghāyal mujhe mā'sūm banī baiThī hai

terī āñkhoñ pe jo palkoñ kī kamāñ hai jānāñ

mere siine pe zarā dast-e-hinā rakh do tum

dil meñ ab 'ishq kā ḳhurshīd javāñ hai jānāñ

kar lī mahtāb ne ye dekh ke rāteñ kaalī

tere hoñToñ pe jo ik til kā nishāñ hai jānāñ

terī āñkhoñ meñ mire donoñ jahāñ baste haiñ

tere qadmoñ pe lagī ḳhaak meñ jaañ hai jānāñ

mere honTon pe meri aah-o-fughan hai jaanan

log kahte hain baDi talKH zaban hai jaanan

jaante hain ki mohabbat ka maraz hai mujh ko

puchh lete hain magar dard kahan hai jaanan

das lagte hain ye duniya ke suKHanwar tere

teri baaton ka wo andaz-e-bayan hai jaanan

kah ke patthar jise duniya ne laga di Thokar

wo mera dil hai mohabbat ka makan hai jaanan

dard diwar pe mandir ki likhi chaupai

aah meri kisi masjid ki azan hai jaanan

kar ke ghayal mujhe ma'sum bani baiThi hai

teri aankhon pe jo palkon ki kaman hai jaanan

mere sine pe zara dast-e-hina rakh do tum

dil mein ab 'ishq ka KHurshid jawan hai jaanan

kar li mahtab ne ye dekh ke raaten kali

tere honTon pe jo ek til ka nishan hai jaanan

teri aankhon mein mere donon jahan baste hain

tere qadmon pe lagi KHak mein jaan hai jaanan