mere kuche se tajalli ko churaate hue log

mere kūche se tajallī ko churāte hue log

zulmat-e-shab tirī tāsīr baḌhāte hue log

liye baiThe haiñ tasavvur meñ koī gahrā nishāñ

surḳh alfāz se tasvīr banāte hue log

terī galiyoñ meñ akelā hī rahā thā lekin

ab nahīñ dekhte mujh ko yahāñ aate hue log

jin kī qabroñ pe kabhī fātiha paḌhtā nahīñ maiñ

mere maazī kā vahī qissa sunāte hue log

mere jaisoñ ko to bāzār meñ aane na diyā

rāsta tere ta'āqub meñ sajāte hue log

hāfiza merā siyah raat ke mānind huā

ab mujhe yaad nahīñ chāñd dikhāte hue log

ye jo qātil haiñ tire in kī to chal ḳhair nahīñ

par tire naam se hangāma uThāte hue log

niiñd dīvār pe laTkā ke rakhī hai 'sayyad'

aur bistar pe haiñ ḳhvāboñ ko nachāte hue log

mere kuche se tajalli ko churaate hue log

zulmat-e-shab teri tasir baDhate hue log

liye baiThe hain tasawwur mein koi gahra nishan

surKH alfaz se taswir banate hue log

teri galiyon mein akela hi raha tha lekin

ab nahin dekhte mujh ko yahan aate hue log

jin ki qabron pe kabhi fatiha paDhta nahin main

mere mazi ka wahi qissa sunate hue log

mere jaison ko to bazar mein aane na diya

rasta tere ta'aqub mein sajate hue log

hafiza mera siyah raat ke manind hua

ab mujhe yaad nahin chand dikhate hue log

ye jo qatil hain tere in ki to chal KHair nahin

par tere nam se hangama uThate hue log

nind diwar pe laTka ke rakhi hai 'sayyad'

aur bistar pe hain KHwabon ko nachate hue log