mere liye wo shaKHs musibat bhi bahut hai

mere liye vo shaḳhs musībat bhī bahut hai

sach ye bhī hai us kī mujhe aadat bhī bahut hai

miltā hai agar ḳhvāb meñ miltā to hai koī

us kī ye ināyat ye muravvat bhī bahut hai

us ne mujhe samjhā thā kabhī pyaar ke qābil

ḳhush rahnā ho to itnī masarrat bhī bahut hai

ulfat kā nibhānā to baḌī baat hai lekin

is daur meñ iz.hār-e-mohabbat bhī bahut hai

jaane pe ba-zid hai to kahūñ is ke sivā kyā

ai dost tirī itnī rifāqat bhī bahut hai

ik fāsla qaa.em hai ba-dastūr ba-har-hāl

hāsil mujhe us shaḳhs kī qurbat bhī bahut hai

jiinā to paḌegā hī baġhair us ke bhī 'rūhī'

hālāñki mujhe us kī zarūrat bhī bahut hai

mere liye wo shaKHs musibat bhi bahut hai

sach ye bhi hai us ki mujhe aadat bhi bahut hai

milta hai agar KHwab mein milta to hai koi

us ki ye inayat ye murawwat bhi bahut hai

us ne mujhe samjha tha kabhi pyar ke qabil

KHush rahna ho to itni masarrat bhi bahut hai

ulfat ka nibhana to baDi baat hai lekin

is daur mein izhaar-e-mohabbat bhi bahut hai

jaane pe ba-zid hai to kahun is ke siwa kya

ai dost teri itni rifaqat bhi bahut hai

ek fasla qaem hai ba-dastur ba-har-haal

hasil mujhe us shaKHs ki qurbat bhi bahut hai

jina to paDega hi baghair us ke bhi 'ruhi'

haalanki mujhe us ki zarurat bhi bahut hai