mere na hoiye mujhe apna na kijiye

mere na hoiye mujhe apnā na kījiye

lekin mazāq-e-husn ko rusvā na kījiye

dil to ye kah rahā hai ki un se gila karūñ

ġhairat ye kah rahī he ki shikva na kījiye

TūTegā nafs kā ye tasalsul ḳhabar nahīñ

chaltī huī havā kā bharosa na kījiye

zālim se gulsitāñ ko bachānā zarūr hai

kuchh gul masal ga.e haiñ to parvā na kījiye

hai aaj tez dhuup meñ himmat kā imtihāñ

is vaqt aap zulf kā saaya na kījiye

'maz.har' vo but-kada ho kalīsā ho yā haram

jab tak na dil jhuke kahīñ sajda na kījiye

mere na hoiye mujhe apna na kijiye

lekin mazaq-e-husn ko ruswa na kijiye

dil to ye kah raha hai ki un se gila karun

ghairat ye kah rahi he ki shikwa na kijiye

TuTega nafs ka ye tasalsul KHabar nahin

chalti hui hawa ka bharosa na kijiye

zalim se gulsitan ko bachana zarur hai

kuchh gul masal gae hain to parwa na kijiye

hai aaj tez dhup mein himmat ka imtihan

is waqt aap zulf ka saya na kijiye

'mazhar' wo but-kada ho kalisa ho ya haram

jab tak na dil jhuke kahin sajda na kijiye