mere pahlu mein kisi jism ka saya tha magar

mere pahlū meñ kisī jism kā saaya thā magar

vo mire paas bahut duur se aayā thā magar

parda haTte hī vahī dekhī dikhā.ī filmeñ

rasm-e-duniyā kā vahī khel-tamāsha thā magar

ab kahāñ mauj-e-sar-e-dahr meñ lafzoñ kā bhañvar

varna miTTī to batātī hai ki dariyā thā magar

jaḌ ukhaḌne pe kahāñ sā’at-e-sabz aa.ī hai

mujh pe bādal to bahut zor se barsā thā magar

ḳhud se bichhḌe hue ik aur baras biit gayā

apne andar se nikalte hue royā thā magar

kaun tā-'umr falak-bos rahā hogā 'ḳhalīl'

varna aflāk se rishta mirā dohrā thā magar

mere pahlu mein kisi jism ka saya tha magar

wo mere pas bahut dur se aaya tha magar

parda haTte hi wahi dekhi dikhai filmen

rasm-e-duniya ka wahi khel-tamasha tha magar

ab kahan mauj-e-sar-e-dahr mein lafzon ka bhanwar

warna miTTi to batati hai ki dariya tha magar

jaD ukhaDne pe kahan sa’at-e-sabz aai hai

mujh pe baadal to bahut zor se barsa tha magar

KHud se bichhDe hue ek aur baras bit gaya

apne andar se nikalte hue roya tha magar

kaun ta-'umr falak-bos raha hoga 'KHalil'

warna aflak se rishta mera dohra tha magar