mere suKHan ko dard ka uslub mil gaya

mere suḳhan ko dard kā uslūb mil gayā

yā'nī ġhazal ko lahja-e-matlūb mil gayā

sāz-e-ġhazal ko husn-e-ġhazal kī talāsh thī

sāz-e-ġhazal ko naġhma-e-marġhūb mil gayā

vo shaḳhs kyoñ na ḳhuld-e-barīñ se ho be-niyāz

qismat se jis ko aap sā mahbūb mil gayā

josh-e-fanā kā zauq chhupā.e na chhup sakā

le ai salīb ab tirā maslūb mil gayā

har ek ko talāsh yahāñ ḳhūb-tar kī hai

maiñ ḳhush-nasīb huuñ ki bahut ḳhuub mil gayā

duniyā meñ aur phir mujhe kyā chāhiye 'adīb'

thā jo bhī mere naam se mansūb mil gayā

mere suKHan ko dard ka uslub mil gaya

ya'ni ghazal ko lahja-e-matlub mil gaya

saz-e-ghazal ko husn-e-ghazal ki talash thi

saz-e-ghazal ko naghma-e-marghub mil gaya

wo shaKHs kyon na KHuld-e-barin se ho be-niyaz

qismat se jis ko aap sa mahbub mil gaya

josh-e-fana ka zauq chhupae na chhup saka

le ai salib ab tera maslub mil gaya

har ek ko talash yahan KHub-tar ki hai

main KHush-nasib hun ki bahut KHub mil gaya

duniya mein aur phir mujhe kya chahiye 'adib'

tha jo bhi mere nam se mansub mil gaya