mere uljhe hue baalon ko sanwara kyon hai

mere uljhe hue bāloñ ko sañvārā kyoñ hai

terī āñkhoñ meñ vahī ḳhvāb-e-zuleḳhā kyoñ hai

kam nahīñ majma.a-e-daryūza-garān-e-ulfat

ai mire chāhne vaale mujhe chāhā kyoñ hai

nang-e-hastī hī nahīñ nang-e-zamāna maiñ huuñ

sajda-e-shauq kā phir mujh se taqāzā kyoñ hai

maiñ to ashkoñ ke sivā kuchh bhī tujhe de na sakā

is qadar pyaar se āḳhir mujhe dekhā kyoñ hai

ab talak jo dil-e-betāb ko bahlā na sakeñ

unhīñ mauhūm umīdoñ kā sahārā kyoñ hai

kyā abhī tak na huī rang-e-zamāna kī ḳhabar

shahr-yāroñ meñ mire ishq kā charchā kyoñ hai

dil-e-dīvāna meñ ik sham.a to jal uTThī hai

dil-e-dīvāna ko andesha-e-fardā kyoñ hai

azmat-e-ishq kā ai dost bharam rakhnā hai

zarre zarre pe ye aks-e-chaman-ārā kyoñ hai

dil meñ rakkhā hai aur āñkhoñ meñ basāyā hai magar

terā 'iqbāl' tire pyaar se Dartā kyoñ hai

mere uljhe hue baalon ko sanwara kyon hai

teri aankhon mein wahi KHwab-e-zuleKHa kyon hai

kam nahin majma-e-daryuza-garan-e-ulfat

ai mere chahne wale mujhe chaha kyon hai

nang-e-hasti hi nahin nang-e-zamana main hun

sajda-e-shauq ka phir mujh se taqaza kyon hai

main to ashkon ke siwa kuchh bhi tujhe de na saka

is qadar pyar se aaKHir mujhe dekha kyon hai

ab talak jo dil-e-betab ko bahla na saken

unhin mauhum umidon ka sahaara kyon hai

kya abhi tak na hui rang-e-zamana ki KHabar

shahr-yaron mein mere ishq ka charcha kyon hai

dil-e-diwana mein ek shama to jal uTThi hai

dil-e-diwana ko andesha-e-farda kyon hai

azmat-e-ishq ka ai dost bharam rakhna hai

zarre zarre pe ye aks-e-chaman-ara kyon hai

dil mein rakkha hai aur aankhon mein basaya hai magar

tera 'iqbaal' tere pyar se Darta kyon hai