mere zaKHmon meri ruswai ko wapas le le

mere zaḳhmoñ mirī rusvā.ī ko vāpas le le

is sulagtī huī tanhā.ī ko vāpas le le

ilm aa.e na agar kaam kisī muflis ke

aa ke mujh se mirī dānā.ī ko vāpas le le

yā to sach kahne pe suqrāt ko maare na koī

yā to sansār se sachchā.ī ko vāpas le le

chīḳh uTThe haiñ mire ghar ke ye ḳhālī bartan

ab to bāzār se mahñgā.ī ko vāpas le le

yā to har samt ye dahshat ke nazāre na dikhā

yā mirī āñkhoñ se bīnā.ī ko vāpas le le

yā to insān ke har zaḳhm ko bhar de maulā

yā to duniyā se masīhā.ī ko vāpas le le

shāhid-e-jurm ho phir bhī na lahū khaul uThe

aise ḳhāmosh tamāshā.ī ko vāpas le le

bazm-e-bātil meñ bhī himmat rahe haq-goī kī

yā mirī tāqat-e-goyā.ī ko vāpas le le

mere zaKHmon meri ruswai ko wapas le le

is sulagti hui tanhai ko wapas le le

ilm aae na agar kaam kisi muflis ke

aa ke mujh se meri danai ko wapas le le

ya to sach kahne pe suqraat ko mare na koi

ya to sansar se sachchai ko wapas le le

chiKH uTThe hain mere ghar ke ye KHali bartan

ab to bazar se mahngai ko wapas le le

ya to har samt ye dahshat ke nazare na dikha

ya meri aankhon se binai ko wapas le le

ya to insan ke har zaKHm ko bhar de maula

ya to duniya se masihai ko wapas le le

shahid-e-jurm ho phir bhi na lahu khaul uThe

aise KHamosh tamashai ko wapas le le

bazm-e-baatil mein bhi himmat rahe haq-goi ki

ya meri taqat-e-goyai ko wapas le le