meri aamad pe sajate the jo rasta mera

merī aamad pe sajāte the jo rasta merā

dil kiyā hai unhī hāthoñ ne shikasta merā

bhiiḌ ko apne ḳhayālāt batā saktā nahīñ

varna ḳhuuñ paanī se ho jā.egā sastā merā

kaise tahzīb-e-‘azā-dārī samajh pā.egā

jis ne dekhā hī nahīñ mātamī dasta merā

bas isī zo'm meñ barbād kiyā hai ḳhud ko

maut ke kaam na aa.e tan-e-ḳhasta merā

roTī hotī na thī aur merī jamā'at ke dost

toḌ dete the bharam khol ke basta merā

lauT ke aa jā mujhe chhoḌ ke jaane vaale

dil tirī diid ko ab bhī hai tarastā merā

gar mujhe yaar ke pahlū meñ jagah mil jaatī

qahr ḳhud par na shab-o-roz barastā merā

ġhair-ābād 'ilāqe bhī basā.e maiñ ne

mujh se lekin dil-e-vīrāñ nahīñ bastā merā

phir kabhī haath na uTh paa.e du'ā kī ḳhātir

itnā dushman ne kiyā pahlū shikasta merā

maiñ ne jab duudh pilāyā thā mohabbat se use

kaise mumkin thā mujhe saañp na Dastā merā

meri aamad pe sajate the jo rasta mera

dil kiya hai unhi hathon ne shikasta mera

bhiD ko apne KHayalat bata sakta nahin

warna KHun pani se ho jaega sasta mera

kaise tahzib-e-‘aza-dari samajh paega

jis ne dekha hi nahin matami dasta mera

bas isi zo'm mein barbaad kiya hai KHud ko

maut ke kaam na aae tan-e-KHasta mera

roTi hoti na thi aur meri jama'at ke dost

toD dete the bharam khol ke basta mera

lauT ke aa ja mujhe chhoD ke jaane wale

dil teri did ko ab bhi hai tarasta mera

gar mujhe yar ke pahlu mein jagah mil jati

qahr KHud par na shab-o-roz barasta mera

ghair-abaad 'ilaqe bhi basae main ne

mujh se lekin dil-e-viran nahin basta mera

phir kabhi hath na uTh pae du'a ki KHatir

itna dushman ne kiya pahlu shikasta mera

main ne jab dudh pilaya tha mohabbat se use

kaise mumkin tha mujhe sanp na Dasta mera