meri betabi ki us dil ko KHabar kyunkar ho

merī betābi kī us dil ko ḳhabar kyūñkar ho

aah kā dosto patthar meñ asar kyūñkar ho

na sirī is meñ na paikān jo khīñchūñ us ko

dil se bāhar ye mirā tīr-e-nazar kyūñkar ho

ek dam tujh se jo hote the judā rote the

sabr duurī meñ tirī aaTh pahar kyūñkar ho

ham-nashīñ shaġhl na hove jo hameñ rone kā

to bhalā hijr meñ auqāt basar kyūñkar ho

jeb siitā hai to kyā ye to batā ai nāseh

chaak ho jaave to paivand-e-jigar kyūñkar ho

sham.a saañ jal ke bujhe to bhī na dekhā us ne

kyā kareñ ab mutavajjah vo idhar kyūñkar ho

al-amāñ dekh ke dilbar ko malak kahte haiñ

aah phir ohda-barā is se bashar kyūñkar ho

tū rahe ġhair ke āġhosh meñ jab saarī raat

phir to rāhat hameñ ai rashk-e-qamar kyūñkar ho

na vo rangat hai na vo us meñ nazākat pyāre

tere hoñToñ se mushābah gul-e-tar kyūñkar ho

apne nazdīk bhī aane nahīñ detā vo mujhe

dil meñ aise but-e-ayyār ke ghar kyūñkar ho

Tuk sañbhāl apne ta.iiñ fā.eda ghabrā.e se

hijr kī raat hai 'afsos' sahar kyūñkar ho

meri betabi ki us dil ko KHabar kyunkar ho

aah ka dosto patthar mein asar kyunkar ho

na siri is mein na paikan jo khinchun us ko

dil se bahar ye mera tir-e-nazar kyunkar ho

ek dam tujh se jo hote the juda rote the

sabr duri mein teri aaTh pahar kyunkar ho

ham-nashin shaghl na howe jo hamein rone ka

to bhala hijr mein auqat basar kyunkar ho

jeb sita hai to kya ye to bata ai naseh

chaak ho jawe to paiwand-e-jigar kyunkar ho

shama san jal ke bujhe to bhi na dekha us ne

kya karen ab mutawajjah wo idhar kyunkar ho

al-aman dekh ke dilbar ko malak kahte hain

aah phir ohda-bara is se bashar kyunkar ho

tu rahe ghair ke aaghosh mein jab sari raat

phir to rahat hamein ai rashk-e-qamar kyunkar ho

na wo rangat hai na wo us mein nazakat pyare

tere honTon se mushabah gul-e-tar kyunkar ho

apne nazdik bhi aane nahin deta wo mujhe

dil mein aise but-e-ayyar ke ghar kyunkar ho

Tuk sanbhaal apne tain faeda ghabrae se

hijr ki raat hai 'afsos' sahar kyunkar ho