meri go aah se jangal na jale KHushk to ho

merī go aah se jañgal na jale ḳhushk to ho

ashk kī tuft se go jal na jale ḳhushk to ho

paak karte hue gar ashk mire dāman kā

nāla-e-garm se āñchal na jale ḳhushk to ho

namī-e-ashk ke baa.is jo mirī aah se raat

zer-e-ruḳh takiya-e-maḳhmal na jale ḳhushk to ho

mehr-vash husn kī garmī se tire vaqt-e-araq

tan pe gar nīma-e-malmal na jale ḳhushk to ho

sāqiyā mausam-e-gul be-mai-o-mīnā jo mirī

aah kī barq se bādal na jale ḳhushk to ho

shola-rū nit kī savārī meñ sabab garmī ke

zer-e-rāñ go tire kotal na jale ḳhushk to ho

ho agar ye dil-e-sozāñ tire quliyāñ kī chilam

āb-e-nai se jo ye narsal na jale ḳhushk to ho

haa.e ai ātish-e-dil aab se garmī se jalā

chashm-e-tar kī mirī chhāgal na jale ḳhushk to ho

tifl bad-ḳhū hai mirā ashk, ḳhudāyā is kī

go ba-ḳhirman huī koñpal na jale ḳhushk to ho

ġharq hai ashk meñ ghar tujh se ab ai nāla-e-garm

go mire sukh kā ye manDal na jale ḳhushk to ho

ashk se ḳhāma rahe jo mire bas meñ na 'baqā'

go tab-e-tan se ye babbal na jale ḳhushk to ho

meri go aah se jangal na jale KHushk to ho

ashk ki tuft se go jal na jale KHushk to ho

pak karte hue gar ashk mere daman ka

nala-e-garm se aanchal na jale KHushk to ho

nami-e-ashk ke bais jo meri aah se raat

zer-e-ruKH takiya-e-maKHmal na jale KHushk to ho

mehr-wash husn ki garmi se tere waqt-e-araq

tan pe gar nima-e-malmal na jale KHushk to ho

saqiya mausam-e-gul be-mai-o-mina jo meri

aah ki barq se baadal na jale KHushk to ho

shola-ru nit ki sawari mein sabab garmi ke

zer-e-ran go tere kotal na jale KHushk to ho

ho agar ye dil-e-sozan tere quliyan ki chilam

aab-e-nai se jo ye narsal na jale KHushk to ho

hae ai aatish-e-dil aab se garmi se jala

chashm-e-tar ki meri chhagal na jale KHushk to ho

tifl bad-KHu hai mera ashk, KHudaya is ki

go ba-KHirman hui konpal na jale KHushk to ho

gharq hai ashk mein ghar tujh se ab ai nala-e-garm

go mere sukh ka ye manDal na jale KHushk to ho

ashk se KHama rahe jo mere bas mein na 'baqa'

go tab-e-tan se ye babbal na jale KHushk to ho