meri har baat pe munh pher ke hansta kya hai

merī har baat pe muñh pher ke hañstā kyā hai

maiñ bhī insān huuñ tū ne mujhe samjhā kyā hai

ek merā hī hai ghar shīshe kā so Dartā huuñ

shahr hī shīshe kā ho jaa.e to ḳhatra kyā hai

zor-e-tambīh se mat chhīniye bachchoñ kī chahak

khilkhilā kar jo na hañstā ho vo bachcha kyā hai

baa'd meñ faisla rahbar ke hunar kā hogā

pahle ye baat to vāzeh ho ki honā kyā hai

uub kar shiddat-e-isrār se haamī bhar dī

dekhnā hai mire iqrār se hotā kyā hai

gar mirī tarh tujhe bhī hai yaqīn-e-kāmil

marnā ik baar hai har aan pe martā kyā hai

aapsī baat se hal nikle sabhī chāhte haiñ

'nazr' batlā.e koī sulh kā ḳhāka kyā hai

meri har baat pe munh pher ke hansta kya hai

main bhi insan hun tu ne mujhe samjha kya hai

ek mera hi hai ghar shishe ka so Darta hun

shahr hi shishe ka ho jae to KHatra kya hai

zor-e-tambih se mat chhiniye bachchon ki chahak

khilkhila kar jo na hansta ho wo bachcha kya hai

ba'd mein faisla rahbar ke hunar ka hoga

pahle ye baat to wazeh ho ki hona kya hai

ub kar shiddat-e-israr se hami bhar di

dekhna hai mere iqrar se hota kya hai

gar meri tarh tujhe bhi hai yaqin-e-kaamil

marna ek bar hai har aan pe marta kya hai

aapsi baat se hal nikle sabhi chahte hain

'nazr' batlae koi sulh ka KHaka kya hai