meri imlak samajh be-sar-o-samani ko

merī imlāk samajh be-sar-o-sāmānī ko

ek muddat se maiñ lāhaq huuñ pareshānī ko

ab ye ma.amūl ke ġham mujh ko rulāne se rahe

sānehe chāhiyeñ ashkoñ kī farāvānī ko

lauT aa.egī jo aflāk se fariyād mirī

kaun baḳhshegā sanad merī sanā-ḳhvānī ko

pesh-e-manzar bhī vahī thā jo pas-e-zāt rahā

ġham kī mīrās milī aañkh kī hairānī ko

siina sad-chāk karo dil se na aġhrāz karo

qaid rahne do abhī dasht meñ zindānī ko

maut bhī dekh ke añgusht-ba-dandāñ hai 'alī'

marqad-e-zīst se lipTī huī vīrānī ko

meri imlak samajh be-sar-o-samani ko

ek muddat se main lahaq hun pareshani ko

ab ye mamul ke gham mujh ko rulane se rahe

sanehe chahiyen ashkon ki farawani ko

lauT aaegi jo aflak se fariyaad meri

kaun baKHshega sanad meri sana-KHwani ko

pesh-e-manzar bhi wahi tha jo pas-e-zat raha

gham ki miras mili aankh ki hairani ko

sina sad-chaak karo dil se na aghraaz karo

qaid rahne do abhi dasht mein zindani ko

maut bhi dekh ke angusht-ba-dandan hai 'ali'

marqad-e-zist se lipTi hui virani ko