meri KHizan hai rang-e-bahaaran liye hue

merī ḳhizāñ hai rang-e-bahārāñ liye hue

kunj-e-qafas hai aks-e-gulsitāñ liye hue

amvāj kā sukūt hai tūfāñ liye hue

har rahguzar hai hashr kā sāmāñ liye hue

jalvoñ kī kā.enāt zarā muntashir to kar

merī nazar hai diid kā armāñ liye hue

phailī huī hai mastī-e-dām-e-bahār-e-nau

har ik ravish hai kaif kā sāmāñ liye hue

tabdīl ho ke rah ga.ī tasvīr-e-kā.enāt

ab ahraman hai azmat-e-yazdāñ liye hue

taḳhlīq-e-haq ko aaj bhī jis par ġhurūr hai

vo azmat-e-buland hai insāñ liye hue

dāġhoñ kā ik chaman mire siine meñ band hai

phirtā huuñ apne saath gulistāñ liye hue

zad par hai inqalāb ke shīrāza-e-hayāt

har dāstāñ hai dard kā unvāñ liye hue

'mushtāq' vo nahīñ haiñ zamāne meñ kāmyāb

baiThe haiñ jo nasīb kā dāmāñ liye hue

meri KHizan hai rang-e-bahaaran liye hue

kunj-e-qafas hai aks-e-gulsitan liye hue

amwaj ka sukut hai tufan liye hue

har rahguzar hai hashr ka saman liye hue

jalwon ki kaenat zara muntashir to kar

meri nazar hai did ka arman liye hue

phaili hui hai masti-e-dam-e-bahaar-e-nau

har ek rawish hai kaif ka saman liye hue

tabdil ho ke rah gai taswir-e-kaenat

ab ahraman hai azmat-e-yazdan liye hue

taKHliq-e-haq ko aaj bhi jis par ghurur hai

wo azmat-e-buland hai insan liye hue

daghon ka ek chaman mere sine mein band hai

phirta hun apne sath gulistan liye hue

zad par hai inqalab ke shiraaza-e-hayat

har dastan hai dard ka unwan liye hue

'mushtaq' wo nahin hain zamane mein kaamyab

baiThe hain jo nasib ka daman liye hue