meri miTTi ka nasab be-sar-o-samani se

merī miTTī kā nasab be-sar-o-sāmānī se

kaam kuchh us ko havā se na talab paanī se

mere atrāf nigāhoñ kī ye dīvār na khīñch

aur āvāra huā jaatā huuñ nigarānī se

apne ā.īne se toḌ aa ke mirā ā.īna

apne ā.īne ko bhar kar mirī hairānī se

ham jo ik umr lagā dete haiñ paas aane meñ

kaise lamhoñ meñ bichhaḌ jaate haiñ āsānī se

hai yahī vaqt ki patthar se ḳhudā paidā ho

dekh ab nuur Tapakne lagā peshānī se

ishq ko hai yahī ik sūrat-e-iz.hār nasīb

jo bhī kahnā hai kahe chāk-garebānī se

shahr ho jaatā hai pahle to junūn-e-nākām

toḌtā hai phir ise sañg-e-bayābānī se

'farhat-ehsās' usī jahl se kar phir se rujūa

tere haq meñ yahī behtar hai hama-dānī se

meri miTTi ka nasab be-sar-o-samani se

kaam kuchh us ko hawa se na talab pani se

mere atraf nigahon ki ye diwar na khinch

aur aawara hua jata hun nigarani se

apne aaine se toD aa ke mera aaina

apne aaine ko bhar kar meri hairani se

hum jo ek umr laga dete hain pas aane mein

kaise lamhon mein bichhaD jate hain aasani se

hai yahi waqt ki patthar se KHuda paida ho

dekh ab nur Tapakne laga peshani se

ishq ko hai yahi ek surat-e-izhaar nasib

jo bhi kahna hai kahe chaak-garebani se

shahr ho jata hai pahle to junun-e-nakaam

toDta hai phir ise sang-e-bayabani se

'farhat-ehsas' usi jahl se kar phir se rujua

tere haq mein yahi behtar hai hama-dani se